مقال أحمد فؤاد نجم فى الدستور

حلاوة زمان

أحمد فؤاد نجم

من يوم ما بدأت حرب الإبادة الجماعية علي أهلنا في غزة، توارت كل الموضوعات الإنسانية بما فيها من هموم وأحلام وقهر واستغلال وقفزت غزة الصامدة إلي صدارة المشهد السياسي في العالم واتفرج يا سلام، أولاً مجموعة من التماثيل الميتة محنطة علي هيئة ملوك وأمراء ورؤساء وقادة وكافة شيء تحتاجه الدولة الحديثة في مطلع القرن الحادي والعشرين الميلادي كله عندنا تمام يا باشا واحنا اللي خرمنا التعريفة وعلمنا النمل يمشي طوابير واحنا احنا احنا واحنا اللي دهنا الهوا دوكو.. ثانياً شعوب منهكة وخايفة من بكره ومن الشرطة، ثالثاً وطن طويل عريض عائم علي بحار من الثروات الطبيعية المنهوبة عياناً بياناً ولا حد قادر يفتح بقه ويسأل مجرد سؤال عن دخل النفط المتدفق من بلاد العرب إلي أمريكا وأوروبا وبلاد تركب الأفيال، ولو حد استجرأ وعملها يبقي شيوعي ملحد أو عامل تنظيم مسلح وعايز يقلب نظام الحكم بالقوة المسلحة، واسألوني أنا مرة واحنا بنتحاكم بالتهمة دي أنا والشيخ إمام ــ الله يرحمه ــ ويبدو أن رئيس المحكمة ماقدرش يمسك نفسه فسأل الشيخ إمام:

ــ إنت يا شيخ إمام كنت عايز تقلب نظام الحكم؟

فلم يتمالك الشيخ إمام نفسه فقال بسخرية واضحة: ــ أبداً والله يا باشا دا أنا كنت عايز أعدله.

وضجت المحكمة بالضحك علي إثر ضحكة عفوية صدرت عن رئيس المحكمة.

> > >

أحمد القزعة شايف موضوع غزة بشكل أغاظ عبده شمة اللي قال لي:

ــ الحق يا عم أحمد القزعة دماغه ضربت خلاص

فتصدي له أحمد القزعة قائلاً:

ــ أنا برضه اللي دماغي ضربت يا عبده يا شمة يا ضايع؟: طب ياريت دماغك تضرب زي دماغي.

قال له:

ــ تحب أقول لعم أحمد الكلام الخايب اللي بتقوله عن غزة؟

ثم التفت نحوي قائلاً:

ــ القزعة فرحان في اللي بيحصل في غزة وبيقول إحنا الكسبانين.

فقال القزعة:

ــ بس يا جهول يا مغيب.. أنا يا عم أحمد رأيي إن أحداث غزة كشفت عورات النظام الرسمي العربي وبقي عريان زي أمه ما ولدته.. تفتكر لو ماحصلتش أحداث غزة كنا حنوصل للنتيجة دي؟

فقال عبده شمة:

ــ طب واللي ماتوا دول ذنبهم إيه؟

قال له:

ــ ذنبهم إنهم ولادنا

فقلت للقزعة:

ــ بس الرقم كبير يا قزعة!

قال لي:

ــ اللي ماتوا في الدويقة أكتر منهم كدا ولا لأ؟.

قلت له:

ــ الدويقة بس؟ ونسيت العبّارة والقطارات والمسارح وحوادث السير وشهداء طوابير الخبز وشهداء أقسام الشرطة وشهداء المدارس الأطفال وشهداء السرطنة المدسوسة في الطعام عن عمد.

قال لي:

ــ قول له بقي المخشمون اللي قصادك ده.

فقال عبده شمة وكأنه يحدث شخصاً غير موجود:

ــ بس ماتقولش مخشمون لاخنفك.

> > >

«نغم» بنوتة سورية جميلة صاحبة البت زينب بنتي كانت بتكلمها في المخروب اللي اسمه الموبايل ولقيت زينب بتناولني الموبايل وهي بتقول:

ــ خد يا بابا نغم عايزة تكلمك.

ــ ألو

ــ ألو يا عمو إزي صحتك وعايزة أسألك سؤال: الأستاذ هيكل قال في الجزيرة إن السيد حسن نصرالله غلط لما طلب من الشعب المصري إنه يقتحم معبر رفح لمساعدة ومساندة الأشقاء في القطاع المحاصر، إنت رأيك إيه؟!.

قلت لها:

ــ يمكن السيد حسن نصرالله تصور إن معبر رفح جنب القاهرة فإن كان أخطأ يبقي خطأ جغرافي مش خطأ سياسي، أما رأي الأستاذ هيكل فده شيء يخصه هو لأن الأستاذ هيكل مش زعيم الأمة العربية ولا معلمها ولا حتي مستشار سياسي للسيد حسن نصرالله إنما أهم بقين وقالهم في قناة الجزيرة وكله بثوابه وثواب قناة الجزيرة بالنسبة للأستاذ هيكل «ثواب فوري» فإنتي يا نغم يا بنتي ماتشغليش دماغك باللي قاله الأستاذ هيكل واكبري بقي وافهمي الدنيا رايحة فين وجية منين عشان احنا سايبين لكم شيلة تقيلة الله يعينكم عليها.